Advertisement 
|
काठमाडौं– राष्ट्रिय फुटवल टिमका स्ट्राईकर विमल घर्तिमगरकी एकमात्र बहिनी मनिषा घर्तिमगर बुधवार दिउँसो ‘आँप खान’ भन्दै घरबाहिर निस्केकी थिईन् । आफ्नो प्रेमी आशिष भनिने रुद्रनारायण चौधरीलाई जानकारी दिएर केटी साथीसँग निस्केकी मनिषा बेलुका ढिला फर्किइन् ।
आशिषले ‘किन ढिला फर्केको’ भन्दै पटक–पटक फोन गरेर हैरान पारेपछि मनिषा ‘मलाई किन यस्तो गर्छौ’ भन्दै रिसाएकी थिईन् ।
बिहीबार विहान घरभित्र मृत अवस्थामा मनिषाको शव फेला परेसँगै प्रहरीले फक्राउ गरेका आशिष चौधरीले दिएको बयान अनुसार मनिषा आशिषलाई सोधेरै ‘आँप खाने र घुम्ने’ भन्दै बजार निस्केकी थिईन् ।
‘घुमेर फर्कन किन ढिला गरेको’ भनेर आशिषले हैरान पारेसँगै शुरु भएको विवादले ‘हत्या अथवा आत्महत्या’ सम्मको अवस्था सिर्जना भएको हुनसक्ने प्रहरीको प्रारम्भिक अनुसन्धानबाट खुलेको छ ।
मनिषाले घर फर्कन ढिला गरेपछि आशिष करिब पाँच बजेतिर घरबाट एक किलोमिटर टाढा रहेको भुताहा भन्ने ठाउँको एक होटलमा छिरेका थिए ।
राजमार्गमै रहेको सो होटलमा पसेपछि उनले आफ्ना अरु दुई जना साथी बोलाएर करिब तीन घण्टा मदिरा सेवन गरेको कुरा प्रहरीसँगको बयानमा स्वीकार गरेका छन् ।
शुरुमा ब्लु रिवाईन्ड नामक रक्सि पिएका आशिषले अन्तमा एउटा वियर पिएका थिए । आशिषसँगै मदिरा सेवन गर्ने एक युवालाई बोलाएर सोधपुछ थालिएको जिल्ला प्रहरी कार्यालय नवलपरासीका डिएपी अर्जुन रानभाटले जानकारी दिए ।
मदिरा सेवनपछि मोटरसाईकलमा केही समय हाइवेमा हुँईकिएका आशिष करिब ८ बजेतिर मनिषाको घरमा पुगेका थिए । घरमा कोही नभएको बारे आशिष जानकार थिए ।
‘मनिषाले बोलाएरै घरमा गएको देखिन्छ’ अनुसन्धानमा संलग्न इन्स्पेक्टर प्रकाश सापकोटा भन्छन्, ‘साँझ मनिषालाई फोनमा सम्पर्क नभएपछि उनकी साथीलाई आशिषले फोन गरेर ‘आज जे पनि हुनसक्छ’ भन्दै धम्क्याएको देखिन्छ ।’
पछि मनिषाको फोन लागेपछि रक्सिको नशालो चुर भएका आशिष मनिषाको घरमा पुगे । त्यहाँ उनिहरुबिच फेशवुकको पासवर्ड चेन्ज गरेको, बजार घुमेर ढिला आएको, फोन स्वीच अफ गरेको लगायतका विषयलाई लिएर निकैबेर झगडा र थप्पड हानाहान भएको प्रहरी अुनसन्धाबाट खुलेको बताईएको छ ।
राति ११ बजेतिर मनिषा झुण्डिएको अवस्थामा आफुले देखेपछि डरले हिँडेको बयान दिएका आशिषले उनको सल घर नजिकैको कल्भर्टमा लगेर फालेका थिए । मनिषा र आशिषको घरको बीचमा रहेको कल्भर्टमा सल फेला परेको इन्स्पेक्टर सापकोटले जानकारी दिए । उनका अनुसार आशिष साँढे ११ बजे आफ्नो घरमा पुगेको देखिन्छ ।
‘हत्या कि आत्महत्या’ भन्नेबारे यकिन नभएको उल्लेख गर्दै सापकोटाले भने, ‘पोष्टमार्टमको रिपोर्ट हेरेपछि मात्रै थाहा हुन्छ ।’
मनिषाको शव काठमाडौंको टिचिङ हस्पिटलमा पोष्टमार्टम गरिएको छ । प्रहरी पोष्टमार्टमको रिपोर्ट पर्खिरहेको छ ।रातो पाटीमा खबर छ !
0 comments
प्रतिक्रिया दिनुहोस्...